"ފާފު ވޮލީ މުބާރާތް 2025" ފ. ފީއަލީގައި ބާއްވާގޮތަށް ނިންމައިފި
ފ. އަތޮޅު ކައުންސިލުން އިންތިޒާމް ކޮށްގެން މިއަތޮޅުގެ ރަށުކައުންސިލްތަކަށް ހުޅުވާލައިގެން ކުރިއަށް ގެންދިއުމަށް ހަމަޖެހިފައިވާ "ފާފު ވޮލީ މުބާރާތް 2025" މިއަތޮޅު ފީއަލީގައި ބާއްވާގޮތަށް ނިންމައިފިއެވެ.
މިއަހަރުގެ ވޮލީ މުބާރާތް ބާއްވާނެ ރަށެއް ކަނޑައެޅުމަށްޓަކައި މުބާރާތް ހޯސްޓް ކުރުމުގެ ފުރުޞަތު ރަށު ކައުންސިލްތަކަށް ހުޅުވާލުމުން މުބާރާތް ހޯސްޓް ކުރުމަށް ހުށަހަޅާފައިވަނީ ފ. ނިލަންދޫ ކައުންސިލުންނާއި ފ. ފީއަލީ ކައުންސިލުންނެވެ. މި ދެ ކައުންސިލުން ހުށަހަޅާފައިވާ ޕްރޮޕޯސަލް އިވެލުއޭޓް ކުރުމުން އެންމެ ގިނަ ޕޮއިންޓް ލިބިގެން ހޯސްޓިން ކާމިޔާބު ކޮށްފައިވަނީ ފީއަލީ ކައުންސިލުން ކަމަށްވާތީ، "ފ. ވޮލީ މުބާރާތް 2025" ފ. ފީއަލީގައި ބާއްވާގޮތަށް ނިންމީއެވެ.
18 ސެޕްޓެންބަރު 2025 ގައި ފެށުމަށް ހަމަޖެހިފައިވާ މި މުބާރާތުގައި ބައިވެރިވާ ކައުންސިލްތަކުން ޓީމު ލިސްޓު ފ. އަތޮޅު ކައުންސިލަށް ހުށަހަޅަންޖެހޭ ތާރީޚަކީ 2025 އޮގަސްޓު 31 ވަނަ ދުވަހުގެ 13.00 ކަމުގައިވަނީ ހަމަޖައްސާފައެވެ. ކޮންމެ ކައުންސިލަކުންވެސް އަންހެން ޓީމަކާއި ފިރިހެން ޓީމެއް ބައިވެރިކުރާ ގޮތަށް ހުޅުވާލެވިފައިވާ މި މުބާރާތުގައި ބައިވެރިވާ ޓީމުތަކުގެ މެދުގައި ގުރުއަތު ނެގުން އޮންނާނީ 2025 ސެޕްޓެންބަރު 15 ވާ ހޯމަ ދުވަހުގެ 10.30 ގައި ފ. އަތޮޅު ކައުންސިލްގެ އިދާރާގައެވެ.
އެހެން އަހަރުތަކަށްވުރެ މިއަހަރުގެ މުބާރާތުގައި ދޭ ފައިސާގެ އިނާމުތައްވަނީ ބޮޑުކޮށްފައެވެ. އަދި ކުރިން ފައިސާގެ އިނާމު ނުދޭ ވަނައަކަށްވެސް ފައިސާގެއިނާމު ދިނުމަށްވަނީ ނިންމާފައެވެ. އެގޮތުން މުބާރާތުގެ ޗެންޕިއަންކަން ހޯދާ އަންހެން ފިރިހެން ކޮންމެ ޓީމަކަށް -/50،000 ރުފިޔާ، ރަނަރަޕް އަންހެން ފިރިހެން ކޮންމެ ޓީމަކަށް -/30،000 ރުފިޔާ ދިނުމަށާއި، ފެއަރޕްލޭ އަކަށްހޮވޭ އަންހެން ފިރިހެން ކޮންމެ ޓީމަކަށް -/5،000 ރުފިޔާ ދިނުމަށް ވަނީ ނިންމާފައެވެ. މީގެ އިތުރުން މުބާރާތުގައި ބައިވެރިވާ ކޮންމެ ކައުންސިލެއްގެ އަންހެން ފިރިހެން ކޮންމެ ޓީމަކަށް -/12،500 ރުފިޔާ ދިނުމަށްވެސް އަތޮޅު ކައުންސިލުންވަނީ ނިންމާފައެވެ.
މީގެ ކުރީގެ އަހަރުތަކުގައި ޗެންޕިއަންކަން ހޯދާ އަންހެން ފިރިހެން ކޮންމެ ޓީމަށް ދީފައިވަނީ -/20،000 ރުފިޔާއެވެ. ރަނަރަޕް އަންހެން ފިރިހެން ކޮންމެ ޓީމަށް ދީފައިވަނީ -/10،000 ރުފިޔާއެވެ. ފެއަރޕްލޭޓީމަށް މީގެކުރިއަކުން ފައިސާގެ އިނާމު ދީފައެއް ނުވެއެވެ. އަދި މުބާރާތުގައި ބައިވެރިވާ ޓީމުތަކަށްވެސް މީގެކުރިން ފައިސާ ދީފައެއް ނުވެއެވެ.
މިއަހަރުގެ މުބާރާތް ހޯސްޓްކުރާ ރަށަކަށް ދިނުމަށް ނިންމާފައިވަނީ -/30،000 ރުފިޔާއެވެ. ވޮލީ މުބާރާތުގެ މީޑިއަރ ޕާޓްނަރެއްގެ މަސައްކަތް ކުރިއަށް ގެންދާ ފަރާތަކަށް ދިނުމަށް ނިންމާފައިވަނީ -/10،000 ރުފިޔާއެވެ. މީޑިއަރ ޕާޓްނަރެއް ހޯދުމާއި، މީޑިއަރ ޕާޓްނަރުގެ ހުރިހާ ކަންކަމެއް ކުރިއަށް ގެންދާނީ ފ. ފީއަލީ ކައުންސިލުންނެވެ.
މިއަހަރުގެ މުބާރާތުގައި ކުޅުންތެރިން ބައިވެރިކުރާގޮތަށް ނިންމާފައިވަނީ ފާއިތުވި އަހަރެކޭ އެއްގޮތަށް ޓީމު ބައިވެރިކުރާ ރަށެއްގެ ރަޖިސްޓްރީގައިވާ ފަރާތްތަކުގެ އިތުރުން އެޓީމެއް ހިމެނޭ ރަށެއްގެ ރަޖިސްޓްރީގައިވާ ފަރާތަކާއި ކައިވެނިކޮށްގެންއުޅޭ ބޭރުއަތޮޅު ތަކަށް ނިސްބަތްވާ ފަރާތްތަކާއި އެފަރާތްތަކުގެ ދަރިންނަށެވެ.
